Кипарското ќофте е одличен предлог за ручек, а миризливите зачини и една тајна состојка му даваат посебен шмек.
Ќофтињата се меѓу омилените јадења, а се прават од мелено месо. Најчесто се сервираат со пире и во сос од домати, а ако сте љубител, тогаш пробајте го рецептот за кипарско ќофте. Една состојка ги разликува од нашите, а тоа е компирот кој се додава, додека зачините им даваат посебен вкус. Ќофтињата во кипарски стил се сочни и вкусни, а можете да ги послужите со ѕаѕики салата.
Потребни состојки:
- 1 кг мелено свинско месо
- 650 гр компири
- 2 кромида
- 1 китка магдонос
- 3 јајца
- 2-3 лажици презла
- 2 лажици суво нане
- малку цимет
- малку мускатно оревче
- сол
- бибер
Подготовка:
Изрендајте ги компирите, а потоа добро исцедете ја целата вода. Кромидот и магдоносот ситно исечкајте ги. Во сад измешајте мелено месо, компири, јајца, магдонос, кромид, презла, потоа посолете и побиберете, па додадете ги другите зачини, како нане, мускатно оревче и цимет. Добро измешајте ја смесата за добро да се измешаат сите состојки, па покријте со проѕирна фолија и оставете ја во фрижидер преку ноќ. Наредниот ден формирајте ќофтиња и пржете на загреано масло.
