Ново истражување откри 178 гени поврзани со тешка форма на депресија. Ова е досега најголемото истражување за врската помеѓу геномите и депресијата.
Иако се проценува дека повеќе од 200 милиони луѓе ширум светот имаат депресивни нарушувања, состојбата што ги предизвикува сè уште не е целосно разбирлива. Научниците сè повеќе се свртуваат кон проучување на генетиката. Направена беше анализа на здравствените картони на повеќе од 300.000 луѓе со цел да забележат генетски сличности, односно обрасци кај луѓето погодени од депресија.
„Многу години знаеме дека ризикот од депресија е генетски определен. Се разбира, тоа може да биде предизвикано и од трауматски настани, но ние неодамна започнавме да ги идентификуваме специфичните гени на ризик и нивните варијанти“, рече Џоел Гелернтер, професор по психологија на Медицинскиот факултет Јеил и еден од научниците кои учествуваа во споменатото истражување.
Ваквите откритија можат да им помогнат на научниците подобро да ги утврдат биолошките корени на депресијата. Тие се надеваат дека овие резултати еден ден можат да помогнат во:
- Утврдување кој дел од населението има најголеми шанси да почне да страда од депресија
- Утврдување кој би имал корист од раната интервенција
- Развој на лекови и дизајн на подобри терапии
Истражувањето беше објавено во списанието Nature Neuroscience минатиот месец. На него присуствуваа научници од Медицинскиот факултет Јеил и Универзитетот Калифорнија-Сан Диего. Како што веќе споменавме, тие спроведоа мета-анализа на здравствени досиеја на повеќе од 300.000 луѓе.
Откриле 178 специфични делови од геномот, познати како локуси, кои се поврзани со ризик од депресија. 77 од нив беа целосно нови локуси кои претходно не беа идентификувани. Студијата исто така откри 223 специфични варијации на ДНК блокови, наречени единечни нуклеотидни полиморфизми или СНП.
„Секој ген поединечно го зголемува или намалува ризикот. Значи, постојат многу варијанти, од кои секоја малку ве предиспонира. Едноставно кажано, ефектите од различни форми на ризик можат да се комбинираат и да ве изложат на поголем ризик“, вели Гелернтер.