Откако претходно денеска беше објавено дека „Rick and Morty“ сѐ уште не е обновена за нова сезона од телевизијата Adult Swim, креаторот на анимираната серија рече дека иднината на неговото дело останува непозната.
Ден Хармон се обрати на Twitter за да ја разјасни ситуацијата околу новата сезона на „Rick and Morty“, која во моментот виси во воздух.
По три неверојатно успешни сезони, фановите на анимираната серија „Rick and Morty“ го нападнаа интернетот и бараат одговор зошто креаторите на серијата, Ден Хармон и Џастин Ројланд, не работат на новата сезона. На ова, Хармон имаше одличен одговор упатен према барањето на еден гневен фан.
„Тешко е да напишеш телевизиско шоу кое не е нарачано од ниту една телевизија, посебно кога се бориш со хроничен алкохолизам. Од друга страна, кога ќе видам дека фанови како тебе плаќаат за да го гледаат...мислам...морам да се напијам нешто“, напиша Хармон на неговиот Twitter профил, откако еден фан го нападна дека бил „мрзелив алкохоличар“.
Сепак, ова не е првпат да се случи голема пауза со цел да се нарача нова сезона од серијата. Во повеќето изјави на членови на телевизијата Adult Swim, тие велат дека нови епизоди можат да се очекуваат најрано кон крајот на 2019 година.
„Навистина работат многу бавно. Не само една, туку сите страни работат бавно, и Ден (Хармон), и Џастин (Ројланд) и Adult Swim. Ми нема никаква смисла, треба да побрзаат“, претходно изјави Рајан Ридли, еден од сценаристите на шоуто.
Сите страни се сигурни дека четвртата сезона ќе се случи, но ниту телевизијата, ниту креаторите не даваат дополнителни информации околу датумот на евентуалната премиера.
