Легендата на рускиот фудбал Игор Акинфеев денеска објави дека става крај на репрезентативната кариера. Голманот се пензионира со одиграни 111 настапи за руската репрезентација и остава зад себе импресивна кариера која траеше цели 14 години.
Акинфеев застана на голот на руската репрезентација како тинејџер и оттогаш стана икона на ЦСКА Москва, репрезентацијата, па и на цела Русија.
Светската јавност за првпат се запозна со Акинфеев за време на Европското првенство 2008 година, кога неговите одбрани ја однесоа Русија до полуфиналето на турнирот. Целата негова кариера беше одбележана преку националните турнири, каде Игор ја покажуваше неговата најдобра форма.
Летово 32-годишниот Акинфеев беше многу зафатен, бидејќи неговата репрезентација играше Светско првенство на домашен терен, каде во осминафиналето ја елиминираа Шпанија а тој одбрани два пенали.
„Секоја приказна има почеток и крај. Мојата приказна со националниот тим дојде до логичен крај. Ми беше огромна чест да бидам капитен на Русија на нашето Светско првенство. Да бидам искрен, никогаш не ни сонував дека такво нешто ќе ми се случи, но дојде во вистински момент – во врвот на мојата кариера“, изјави Акинфеев.
Игор Акинфеев дебитираше за репрезентацијата на Русија во 2004 година, кога имаше само 18 години, а во наредните 14 години успеа да забележи 111 настапи.