Гонсало Игуаин признава дека еден ден има намера да се врати во својот омилен Ривер Плејт каде би ја завршил кариерата.
„Никогаш не сум ја отпишал опцијата за враќање во Ривер. Имаат одличен тренер со кој имам добри односи, а навивачите секогаш биле приврзани кон мене. Но, сега мислам на сегашноста и се чувствувам добро во Италија. Забавно ми е“, изјави Игуаин за Fox Sports.
Сегашниот тренер Марсело Гажардо му беше соиграч и ментор кога настапуваа заедно за „лос мижонариос“ на почетокот од овој век пред Игуаин да се пресели во Реал Мадрид.
„Како што реков, не отфрлам таква опција. Иднината е несигурна. Имам двегодишен договор со Јуве, а потоа ќе видиме“. Напаѓачот е во Јуве од 2016 кога дојде од Наполи.
„Отсекогаш сум бил приврзан за Ривер, за играчите и за навивачите. Да бидам искрен, не знам што ќе се случи. Во моментов уживам во Јуве.“
31-годишниот Игуаин е дете на Ривер Плејт каде изникна од младинските категории. За првиот тим одигра само 41 натпревар бидејќи брзо беше уловен од Реал Мадрид кога во декември 2006 дојде во Европа.
