Фудбалерите на Интер излегоа како победници од „Миланското дерби“ кое синоќа се одигра на Џузепе Меаца. Единствениот гол го постигна капитенот на домаќините, Мауро Икарди, по една грешка на гостинскиот голман.
Пред само 2 години Антонио Донарума беше опишуван како новото „чудо од дете“ и требаше да биде долготрајна замена за Џанлуиџи Буфон на голот на италијанската репрезентација, но и нов лидер чија задача беше да го врати Милан во врвот на европскиот фудбал. Денес тој е само сенка од тој Донарума и поради тоа добива многу критики од фановите, а вчерашната грешка го чинеше неговиот тим пораз во градското дерби.
Интер се наоѓа во одлична форма и вчера ја запиша седмата победа во низа, додека Милан го забележа првиот пораз од август наваму. Формалниот домаќин беше далеку подобар противник во второто полувреме, но сепак му требаше голманска грешка за да го пронајде патот до мрежата. За нивна среќа, Донарума лошо ја процени топката во 92 минута од натпреварот и на Икарди му преостана само да ја смести топката во празната мрежа.
Пред ова коло Милан успеа да врзе две победи во лигашките натпревари, но изгледа дека тоа беше само моментална форма на некогашниот италијански гигант. Вчера тимот изгледаше немоќно на теренот, а Интер само ја продолжи агонијата на Милан.
Со оваа победа Интер се искачи на третото место на табелата, престигнувајќи го тимот на Лацио и сега се наоѓа на само 2 бода зад второпласираниот Наполи. Од друга страна, Милан забележа уште еден пад на табелата и сега се наоѓа на 12 место на табелата во Серија А.