„Секоја минута во Јемен се разболува по едно дете од колера, а епидемијата на болеста почна да излегува од контролa“ предупреди денеска меѓународната хуманитарна организација Save the Children.
Експертите предупредуваат дека илјадници луѓе можат да умрат од болеста следните месеци и додаваат дека постои можност да се заразат до 300 илјади лица бидејќи бројот на заболените драстично се зголемил изминативе недели.
Граѓанската војна, која беснее во арапската земја предизвика глад и недостиг на чиста вода, со што се интензивира и ширењето на колерата, цревно заболување кое може да убие човек за неколу часа.
Здравствениот систем на земјата не е во можност да се справи со ситуацијата. Болниците се преполни, а недостигаат лекарства и инфузии.
Епидемијата изби кон крајот на април и, според UNICEF, досега починале над 920 лица, а регистрирани се 124 илјади случаи на заболувања, од кои речиси половина се деца.
Над два милиона деца во земјата се неухранети и тие поради падот на имунитетот полесно можат да заболат.