Повеќе од 6.000 Колумбијци позираа голи на главниот плоштад во Богота како дел од мировниот проект на фотографот Спенсер Туник. Со оглед на температурата од седум степени Целзиусови ова беше вистински храбар потег.
Желбата на луѓето што учествуваат во проектот е да пратат порака за мир во време кога во нивната земја се водат преговори меѓу властите и бунтовниците од Револуционерната армија.
„Среќни сме што сме голи, тивки и мирни. Ова е момент на мир што сите го споделуваме. Ова е момент на обединување, време за искоренување на предрасудите“ - изјави учесничката Клаудија Бариентос.
Карлос Балтран вели дека ова е голем настан со кој покажале дека сите луѓе се еднакви.
Фотографот Туник, кој е познат по ваквите фотографиии, вели дека неговата намера била да го покаже телото како убава органска целина која го трансформира владиниот простор на плоштадот.
„Чест е да се биде овде во овој момент на животни промени и се надеваме дека мировниот договор ќе биде потпишан“ - изјави тој.
Плоштадот Боливар е место на кој се наоѓаат Конгресот, Градскиот совет, Врховниот суд и главната катедрала на Колумбија. Колумбискиот конфликт почна во 1960 година, а во него досега погинале 260.000 луѓе.