Полицијата во Виена вчера уапси 14 учесници во протестите против рестриктивните мерки поради COVID-19.
Околу 3.000 луѓе биле присутни на протестот. Полицијата соопшти дека употребила солзавец за да ги спречи луѓето кои биле против протестот, а кои се обиделе да ги пробијат оградите за да се судрат со демонстрантите.
Подрачјето на австрискиот главен град и други покраини во источниот дел на земјата се затворени овој месец поради зголемениот број на заразени лица со коронавирусот.
Австрија се подготвува за отворање на повеќе сектори од јавниот живот во мај, кога ќе го надмине еден од најлошите периоди од почетокот на пандемијата, меѓу другото и со помасовното вакцинирање на населението.
За да го забрза процесот на имунизација, австриската Влада најави купување на руската вакцина Спутник V, иако таа сè уште не е одобрена во ЕУ.
Австрија од почетокот на пандемијата има 571.616 заразени лица и 9.624 смртни случаи како последица на COVID-19.