Илјадници профили на Twitter отворени на руски или на унгарски јазик повторно се активирани како турски корисници неколку недели пред изборите во Турција на 14 мај, што ја зголемува можноста за мешање во изборите преку социјалните мрежи, пренесува Middle East Eye.
Иако само една четвртина од населението во Турција користи Twitter, оваа социјална мрежа е важен засилувач што може да влијае на дебатата пред изборите.
Ахмет Туран Хан, генерален директор на компанијата за политички консултации и истражување Datailor, вели дека откриле мрежа на корисници на Twitter – најверојатно ботови – кои неодамна го промениле својот идентитет.
„Околу 12.000 профили на Twitter на руски и унгарски јазик беа активирани како турски и сега ги следат сите политички партии и лидери. Најмалку 10.000 од нив се активирани во последните две недели“, вели Хан.
Хан истакна дека 56% од овие профили во минатото споделувале содржина на руски јазик, 28 % на унгарски, а преостанатите споделувале содржина на англиски.
„Веруваме дека унгарските профили биле користени пред унгарските избори минатата година“, рече тој.
Турскиот Twitter е особено подложен на тролање и ширење лажни вести бидејќи најголемите политички партии – и владејачките и опозициските – ја туркаат својата агенда преку т.н. бот-профили.
Претходните истражувања спроведени во 2021 година покажаа дека од 30 до 50 отсто од трендовските теми во Турција се лажни и се главно поттикнати со употреба на ботови.
Во 2020 година Twitter затвори околу 7.340 профили во Турција тврдејќи дека тие се „информативни операции поврзани со државата“.
