Илон Маск, во интервју на Светскиот владин самит во Дубаи, рече дека крајот на 2023 година ќе биде добро време да се повлече од првата позиција на Twitter. Тогаш, како што вели, компанијата треба да биде во стабилна позиција.
Уште во декември, Маск ги праша своите следбеници дали треба да се повлече од функцијата извршен директор на Twitter, тврдејќи дека ќе го слуша гласот на јавноста.
Да потсетиме дека во анкетата учествувале 17,5 милиони луѓе, од кои 57,5 отсто гласале Маск да ја напушти челната позиција на компанијата.
Маск ги прифатил резултатите од истражувањето позитивно, па набрзо најави дека ќе се повлече од функцијата извршен директор штом најде некој „доволно луд“ да ја преземе работата.
Помина извесно време од тогаш, а шефот на Twitter дури сега откри кога тоа би можело да се случи.
„Мислам дека треба да ја стабилизирам компанијата и да се уверам дека е во финансиски добра позиција и планот за производи е на место. Претпоставувам дека крајот на годината би бил добро време да најдам некој друг да ја води компанијата бидејќи мислам до крајот на годината треба да бидеме во стабилна позиција“, рече Маск во онлајн интервјуто.
За да се доведе Twitter во стабилна состојба, потребна е многу работа, бидејќи, како што вели Маск, станува збор за „обратен стартап“. Но, се чини дека на Маск работа не му недостига, бидејќи истакна дека работата го окупира од моментот кога ќе се разбуди до заспивање. Тој наведува дека работи седум дена во неделата, а спие шест часа навечер.
„Не ми е намерата да работам како луд, би било добро 80-часовна работна недела. За тоа би се стремел“, заклучил Маск во разговорот.