Милијардерот Илон Маск се закани дека ќе се откаже од понудата вредна 44 милијарди долари за купување на Twitter. Маск ја обвини компанијата дека одбива да му даде информации за бројот на лажни профили, пишува AP.
Адвокатите на Маск упатија писмо во кое се надведува дека Маск повеќе пати побарал информации за да се процени колку профили на Twitter се лажни од вкупно 229 милиони профили.
Акциите на Twitter Inc денес паднаа за 5 проценти. Во писмото на адвокатите стои дека Twitter понудил само детали за методите на тестирање на компанијата, но тие тврдат дека тоа е еднакво како одбивањето на Маск за барање податоци. Маск ги бара тие податоци за да направи сопствена проверка бидејќи смета дека методологијата на Twitter има маани.
Маск верува дека компанијата дава отпор и не ги почитува неговите права на информации со договорот за спојување потпишан претходно, велат адвокатите.
„Ова е очигледна материјална повреда на обврските на Twitter кон договорот за спојување и затоа господин Маск ги задржува сите права кои произлегуваат од тоа. Тоа го вклучува и правото да не ја купи компанијата и право да го раскине договорот за спојување“, стои во писмото на адвокатите.
Параг Агравал, извршниот директор на Twitter, вели дека компанијата доследно проценува дека помалку од 5 проценти од профилите на Twitter се лажни.
Маск, како еден од најактивните славни корисници на Twitter, има проблеми со ботови бидејќи многу лажно профили го имитираат и се извлекуваат со измами со криптовалути. Ако Маск го прекине договорот за продажба со Twitter, можно е да плати надомест од милијарда долари, сметаат експерти.
