Во Африка има еден дечко кој би можел да биде африканскиот Илон Маск.
Зошто? Затоа што направи автомобил од фрлени делови.
Кој е тој, како го направи тоа чудо и дали може ова возило да биде самовозечко, како некои од моделите на Tesla?
Во трошна куќа во Гана, Nas Daily го пронајде Келвин, сиромашен млад човек кој расте во земја каде просечната плата е помала од триста долари месечно. Но, тоа не ги попречуваше неговите амбиции да стане инженер. Уште од неговата десетгодишна возраст, Келвин минуваше време во гаражата правејќи играчки, роботи, па дури и правосмукалки од отпад, делови и други предмети што ги наоѓа насекаде околу него.
„Сфатив дека имам страст за создавање машини, не сум посетувал никакво училиште за инженери, самоук сум“, вели Келвин.
Четири години поминал во автомеханичарски работилници и автосалони за да научи сè за автомеханиката. Собрал делови од депонии, градилишта, по улици...
„Кога започнав да правам автомобили, луѓето не разбираа што навистина сакам да направам. Се обидуваа да ме обесхрабрат, некои дури ми рекоа дека сум луд“, се сеќава тој.
Но, чекор по чекор, автомобилот ја доби посакуваната форма. Сепак, не можеше да се собере сè од улица, па Келвин вложи уште поголем труд за да заработи пари за моторот. Така, на 18-годишна возраст, по многу неуспешни обиди и грешки, Келвин конечно успеа да ја приврши работата - автомобилот го виде светлото на денот. Го доби името Kelvin Mobile.
Вратите на возилото се отвораат нагоре, како на Ferrari има 300 коњски сили и сè што има „нормален“ автомобил - дури и радио.
„Сè на сè, ме чинеше помалку од 3.000 долари“, вели дечкото кој е единствениот во градот кој поседува автомобил. Ова значи дека секојпат кога „врти кругче“, го привлекува вниманието на целата област, луѓето излегуваат на улиците и следат каде ќе оди.
Она што е уште пофасцинантно е фактот дека Келвин нема намера да застане тука - напротив, следната цел што си ја постави е да направи самовозечки електричен автомобил. И после тоа? Вредниот и амбициозен млад човек фантазира и за производство на авиони и ракети - дали ќе успее во тоа, останува да видиме...