Новиот сопственик на Twitter, Илон Маск, денеска соопшти дека дава „амнестија“ за суспендирани профили.
Објавата следеше откако тој објави анкета на Twitter за реактивирање на профили кои „не го кршат законот или шират одвратен спам“. „За“ гласаа 72,4 отсто од оние кои одговориле.
„Народот го кажа своето. Амнестијата почнува следната недела. Vox Populi, Vox Dei“, напиша Маск на Twitter, користејќи ја латинската фраза што значи „Гласот на народот, гласот на Бога“.
Претходно го врати профилот на Трамп
Маск ја употреби истата латинска фраза откако објави слична анкета минатиот викенд пред повторно да го активира профилот на поранешниот американски претседател Доналд Трамп, кој беше забранет поради поттикнување немири во Капитол на 6 јануари 2021 година. Трамп рече дека нема да се врати на Twitter, но не го избриша профилот.
Еден ден откако ја презеде контролата, Маск објави на Twitter дека нема да бидат вратени суспендираните профили додека Twitter не формира „совет за уредување на содржината“ за да ги разгледа случаите.
Во вторникот, тој рече дека го отфрла ветувањето бидејќи се согласил на тоа на инсистирање на „големата коалиција на политички и општествени активистички групи“ кои подоцна „го прекршија договорот“ кога ги повикаа огласувачите барем привремено да престанат да се рекламираат на Twitter.
