Бизнис

Има ли крај на маките на Tesla – Уште еден директор го напушти Елон Маск

22. септември 2018 - 12:20 | А.С.

Американската компанија за електричи возила Tesla остана без уште еден раководител. Потпретседателот на одделението за глобалниот синџир за набавка Лајам О’Конор му ја достави оставката на Елон Маск.

Веста за неговото заминување прв ја објави „Блумберг“, откако инсајдерски извори од компанијата ја потврдија оставката на О’Конор.

Ниту од компанијата, ниту О’Конор не сакаа да ја коментираат објавената вест.

О’Конор, кој дојде во Tesla од Apple  во 2015 година, е најновото име во низата директори во компанијата што го напуштија Елон Маск во оваа бурна година за него и за Tesla.

Во изминатите квартали, компанијата се соочи со одложувања во производството, пад на цените на акциите и истрага за контроверзното однесување на претседателот Маск.

Главниот директор на сметководство Дејв Мортон поднесе оставка во почетокот на септември по еден месец на функцијата , а претходната шефица на одделот човечки ресурси Габи Толедано рече дека нема да се врати од претходно најавеното отсуство.

Најмалку 42 управители ја напуштија Tesla годинава, односно вкупно 59 во изминативе 12 месеци. Вредноста на акциите на Тesla вчера падна за околу 7% на 298,33 долари.

Коментирај