Иман Хелиф одговори на обвинувањата дека е маж: Ми направивте неправда, но Алах е со мене

Алжирската боксерка Иман Хелиф се пласираше во полуфиналето на Олимписките игри и така ѝ го обезбеди првиот медал на својата земја во Париз, а по триумфот ја критикуваше Меѓународната боксерска асоцијација (ИБА).

Хелиф е биолошки жена и не е транс лице, но беше откриено дека има вишок на машки хормони, што доведе до сомневање дека е машко.

Меѓународниот олимписки комитет ѝ дозволи на Хелиф да се натпреварува во женска конкуренција иако Меѓународната боксерска асоцијација (ИБА) претходно ѝ забрани учество на Светското првенство минатата година.

„Со години боксувам под покровителство на Меѓународната боксерска асоцијација, која ми направи неправда. Но, Алах е со мене. Алаху Акбар!“, изјави Алжирката по борбата.

Хелиф со едногласна одлука ја победи Унгарката Ана Лука Хамори, а на крајот од мечот не можеше да ги сокрие емоциите и заплака по сѐ што ѝ се случуваше претходните денови.

Алжирката со победата против Хамори обезбеди медал, бидејќи во боксот медали се доделуваат на сите што ќе влезат во полуфиналето. За пласман во финалето ќе се бори во вторник.