Ако ја држите раката поставена погрешно додека мерите крвен притисок, може да ви биде дијагностициран висок крвен притисок, покажуваат истражувањата.
Научниците открија дека положбата на рацете прави „огромна разлика“ за да се добијат точни резултати.
Истражувачите во Соединетите Американски Држави открија дека кога раката стои свисната или без потпора, се преценува систолниот притисок (најгорниот број во отчитувањето на крвниот притисок) за 6,5 mmHg и дијастолниот крвен притисок (долниот број) за 4,4 mmHg, пишува The Telegraph.
Со ставање на раката во скут систолниот притисок покажува повисока вредност за 3,9 mmHg, а дијастолниот крвен притисок за 4 mmHg.
NHS советува дека правилниот начин за мерење е да седите на исправен стол со потпирач за грб, да ги ставите двете стапала рамно на подот и да ја потпрете раката на масата.
Исто така, на пациентите им се препорачува да се одморат пет минути пред мерењето.
Високиот крвен притисок го зголемува ризикот од срцев и мозочен удар, како и болести како васкуларна деменција, но бидејќи нема симптоми, невозможно е да се открие без тестирање.
NHS советува дека нормалниот крвен притисок е помеѓу 90/60 mmHg и 120/80 mmHg.
За покачен крвен притисок се смета 135/85 или повисок ако мерењето се прави дома, или 140/90 mmHg или повисоко ако мерењето се прави во аптека, кај општ лекар или во клиника.
