Singer преку социјалните мрежи го откри изгледот на својата најнова креација.
Станува збор за моделот Big Sur, чиј секој дел е елегантен и префинет исто како што би се очекувало од познатиот тјунер на автомобилите на Porsche.
Big Sur е обоен во Horizon сина боја и има Singer Racing портокалови линии, а оваа комбинација на бои му оддава почит на големиот спонзор на Porsche, Gulf Oil. Спонзорската „облека“ е видена на легендарните тркачки автомобили од 1960-тите и 1970-тите години, а најмногу се поврзува со Porsche 917k.
Horizon сината боја е присутна и во внатрешноста, вклучувајќи го централниот гребен и праговите. Купувачот нарачал спортски седишта со електронско подесување, а обложени се со ткаена кожа во боја на коњак, додека задниот дел од потпирачот е црн. Задните седишта се обложени со иста кожа како и панелите на вратите.
Автомобилот е придвижуван од 4,0-литарскиот мотор на Singer, кој е модифицирана верзија на 3,8-литарскиот мотор Cosworth што го нуди и Singer. Развиен од Ed Pink Racing, испорачува 390 КС и 427 Nm вртежен момент. Силата се пренесува на задните тркала преку 5-степен мануелен менувач подготвен од компанијата Getrag Together.
За забрзување од 0 до 100 km/h потребни му се 3,3 секунди.
