Кошаркарите на Индијана Пејсерс го совладаа Њујорк Никс со 116:103 во шестиот полуфинален натпревар од плеј-офот на Источната конференција и израмни на 3:3 во партии, па седмиот дуел ќе го решава патникот во финалето.
Индијана одигра еден од најдобрите натпревари во сезоната, а клучен беше третата четвртина кога отидоа на плус 12 и без поголеми проблеми го задржаа тоа водство до крајот.
Одличен беше Паскал Сјакам со 25 поени и 7 скока, Мајлс Тарнер додаде 17 поени и 8 скока во редовите на победничкиот тим, а забележителни беа и Тајрис Халибртон и Ендрју Нембхард со по 15 поени.
На другата страна се истакна Џејлен Брунсон со 31 поен и 5 асистенции, но со катастрофален 11/26 шут од поле.
Во првото полувреме промаши дури 11 шута. Вво редовите на Никс солидни беа и Дус МекБрајд со 20 поени и Донтеј ДиВинчензоу со 17 поени.
Решавачкиот натпревар број 7 ќе се игра в недела од 21:30 часот по македонско време во „Медисон Сквер Гарден“. Директен пренос ќе оди на каналите на ArenaSport.
