Клима уредите можат да допринесат кон глобалното затоплување, но во земји како Индија, тие се неопходни за време на летниот период. Затоа, дизајнерска компанија од Индија смисли паметен начин да направи клима уред кој не користи електрична енергија.
Компанијата „Ant Studio“, со седиште во Њу Делхи, успеа да дизајнира и да изгради структура која ја има истата функција како клима уред, односно го разладува воздухот. Притоа, оваа структура не користи електрична енергија, што ја прави идеална за користење и во посиромашните краеви на Индија.
Структурата е составена од стотина глинени цевки кои создаваат кошница внатре во металната рамка. Во изработката помогна и компанијата „Deki Electronics“, која исто така е сместена во главниот град на Индија.
Кога кошницата ќе се наполни со вода, глинените цевки ја апсорбира водата и од нив испаруваат ладни воздушни струи додека низ нив поминува топол воздух. Структурата е со прифатлива цена приспособена на помалку имотните краеви во Индија. Исто така, не е нездрава за воздухот и атмосферата.
„Како архитект, сакав да пронајдам решение кое е еколошки прифатливо но и уметнички настроено, а притоа да ги претставува и традиционалните занаети“, рече Мониш Сирипурар, основачот на „Ant Studio“.
