„Ако некој има iPhone 16 во Индонезија - тој уред е нелегален. Пријавете нешто такво“, изјави министерот за индустрија на оваа азиска земја.
Индонезиската влада ја забрани продажбата и употребата на два од уредите на Apple, паметните телефони од серијата iPhone 16 и паметните часовници Apple Watch 10 во таа земја.
Необичната забрана следи по неисполнетите инвестициски обврски на Apple во Индонезија, бидејќи технолошкиот гигант од Купертино претходно вети дека ќе инвестира повеќе од 1,71 трилиони индонезиски рупии (околу 109 милиони долари) во изградба на капацитети за истражување и развој.
„Ако има и еден iPhone 16 што може да работи во Индонезија, тоа значи дека можам да кажам дека уредот е нелегален. Ве молиме пријавете ни ако видите нешто такво“, рече министерот за индустрија на Индонезија, Агус Гумиванг Картасасмита.
Apple, според најновите податоци, досега инвестираше 1,48 трилиони рупии (95 милиони долари), што го принуди индонезиското Министерство за индустрија да го блокира издавањето на сертификати IMEI (Меѓународен идентитет на мобилна опрема) за телефоните iPhone 16 и часовниците Apple Watch Series 10.
На туристите и членовите на екипажите на авиокомпаниите ќе им биде дозволено да ги носат и користат спорните уреди во Индонезија, но нема да можат да ги продаваат во таа земја бидејќи тоа би ја прекршило забраната, ја објасни владината одлука индонезиската новинска агенција Antara.
Индонезиските закони бараат странските компании кои работат во таа земја мора да обезбедат 40% „локална содржина за работа“ за да добијат сертификат за ниво на домашна компонента (TKDN). Постојат три опции за исполнување на ова барање: производство на локални уреди, локален развој на софтвер или основање локални центри за истражување и развој.
