Шефот на Instagram, Адам Мосери, во текот на викендот објасни зошто некои видеоклипови објавени на социјалната мрежа биле со послаб квалитет откако биле објавени, а одговорот лежи во нивните перформанси.
Одговарајќи на прашање за тоа колку старите Story објави изгледаат „матно“ во Highlights, Мосери откри за што всушност се работи.
„Генерално, сакаме да ги прикажеме видеата со највисок можен квалитет. Меѓутоа, ако нешто не се гледа подолг временски период, а знаеме дека поголемиот дел од прегледите се бележат по објавувањето на видеото, во тој случај ние префрламе на послаб квалитет на видеото, од друга страна, ако видеото подоцна стане популарно, ќе го вратиме на повисок квалитет.
Сепак, тој додаде нешто што предизвика загриженост кај „помалите“ креатори.
„Имаме тенденција да фаворизираме повисок квалитет за креаторите кои привлекуваат повеќе прегледи“, рече шефот на Instagram, што значи дека помалите креатори на содржини би можеле да бидат во неповолна положба во споредба со другите со поголеми платформи.
Сепак, Мосери изјави дека промената во квалитетот на видеото „не е огромна“ и дека публиката повеќе се грижи за содржината на видеото отколку за квалитетот на неговата презентација.
„Се чини дека квалитетот е многу поважен за оригиналниот креатор отколку за публиката“, изјави Мосери, но многумина не би се согласиле со него.
