Годинава Instagram доживеа неколку промени, некои од нив подобро прифатени, некои не баш толку, но новата измена би требало да ги задоволи оние корисници кои сметаат дека е напорно да пишуваат на тастатура додека се во комуникација со некого.
Поради тоа, Instagram од вчера ги воведе говорните пораки во инбокс сандачето.
Оваа нова опција ќе им дозволи на корисниците да снимат и испратат кратка аудио порака во приватни и групни разговори со другите корисници. Должината на аудио фајлот мора да биде до една минута. Опцијата веќе од вчера е достапна кај корисниците на iOS и Android.
Корисните ќе можат да снимат порака со притискање и држење на иконата која покажува микрофон, која се наоѓа во менито во полето за разговор. Пораката ќе биде испратена во истиот момент кога корисникот ќе го тргне прстот од иконата, така што во случај да не сте задоволни од пораката или пак ако сакате да ја снимите одново, можете да ја избришете со притискање на иконата со мала канта за ѓубре.
Иако малку доцни во играта со говорни пораки, сепак овој новитет му дава една сосем нова димензија на Instagram, која веројатно ќе ја олесни комуникацијата помеѓу корисниците. Сепак, ниту оваа промена не дојде без негативни реакции, бидејќи дел од корисниците реагираа дека Instagram полека станува само копија на Facebook поради тоа што ги прифаќа сите карактеристики на оваа социјална мрежа.
