Корисниците на Instagram во Турција известуваат дека пристапот до социјалната мрежа е блокиран втор ден по ред.
Управата за комуникации на BTK во петокот на својата веб-страница објави дека платформата во сопственост на Meta е замрзната, без да наведе причина.
Министерот за транспорт и инфраструктура, Абдулкадир Уралолу, вчера изјави дека Instagram ги игнорирал барањата на владата за отстранување на одредени објави.
„Нашата земја има вредности и чувствителност. И покрај нашите предупредувања, тие не ја земаа предвид криминалната содржина. Го блокиравме пристапот. Откако ќе се усогласат со нашите закони, ќе ја укинеме забраната“, рече тој.
Блокирањето на Instagram дојде неколку дена откако директорот за комуникации на турскиот претседател, Фахретин Алтун, рече дека платформата во сопственост на Meta не им дозволува на луѓето во Турција да објавуваат пораки со сочувство за убиениот функционер на Хамас, Исмаил Ханије.
Според турските медиуми, во Турција има повеќе од 50 милиони регистрирани корисници на Instagram.
