Се комплетираа полуфиналните двојки во италијанскиот куп откако синоќа Интер ја елиминираше Фиорентина.
„Виолетовите“ од Фиренца ќе почекуваат барем уште една година во потрагата по нивниот седми куп трофеј откако на „Меаца“ во Милано домаќинот Интер триумфираше со 2:1 и обезбеди полуфинале.
На првиот гол се чекаше до претпоследната минута од првиот дел кога Антонио Кандрева налета на една топка и без проблем ја смести во мрежата на Пјетро Терачано.
Фиорентина израмни во 60. минута преку Мартин Касерес кој највисоко скокна во домашниот шестнаесетник и со глава го совлада одличниот Самир Хандановиќ.
Меѓутоа, седум минути подоцна Николо Барела со топовски удар од прва повторно го врати водството за Интер, што се покажа и како конечен резултат.
Во домашниот тим дебитираа новаците Кристијан Ериксен и Виктор Мозис кои овој преоден рок дојдоа во Интер. Двајцата влегоа во игра во вториот дел.
Со овој натпревар се комплетираа полуфиналните двојки. Интер за финале ќе се бори со Наполи, додека Милан против Јувентус. Првите натпревари се играат веќе на 12 февруари.