Актуелниот италијански шампион, и главен фаворит за одбрана на титулата, денеска го претстави својот трет дрес кој изненади многумина поради изборот на шарени бои.
Со оглед на тоа што дресот доаѓа на само ден пред натпреварот од Лигата на шампиони против Реал Мадрид, веќе се шпекулира дека утревечер на „Џузепе Меаца“ „Нераѕурите“ ќе истрчаат токму во оваа варијанта.
„Браќа и сестри ширум светот. Третиот дрес од Nike за сезоната 2021/22 зема инспирација од вредностите на вклучителност и еднаквост, кои се дел од ДНК на Интер уште од самите почетоци на клубот“, стои во клупското соопштение.
Како што е познато, поради дискриминација кон странците кои живееле во Милано и на кои им било забрането да играат фудбал за клубот Милан, тие се собрале и го формирале Интер, намерно бирајќи го тоа име (Интернационале) ставајќи дознаење дека кај нив секој ќе биде добредојден.
Воедно, дресот кој ќе го носат играчите, но и репликата која ќе биде во продажба за навивачите, се направени од 95% рециклирани пластични шишиња, револуционерна технологија која ја штити природата од загадување со пластика.
Дресот веќе од денеска е достапен за продажба преку клупската веб-страница, како и во одредени продавници низ Милано, а од 17-ти месецов ќе биде достапен и во сите продавници на Nike.