Милано е обоен во црно и сино откако попладнево Интер со високи 3:0 го декласираше Милан во големото градско дерби.
Ништо од експресното враќање на врвот на „Росонерите“. Милан претрпе убедлив пораз од лутиот ривал Интер откако тактиката на Стефано Пиоли се сруши по само 5 минути игра кога Ромелу Лукаку одлично го пронајде Лаутаро Мартинес за водство од 0:1.
„Нераѕурите“ ја контролираа играта, успешно ја неутрализираа тактиката на Милан не дозволувајќи сериозен напад по голот на Самир Хандановиќ. Златан Ибрахимовиќ остана без муниција и по подолго време не успеа да постигне гол против Интер кој обично му е редовен муштерија.
На вториот гол се чекаше до 57. минута. Овој пат Кристијан Ериксен одлично го проигра Иван Перишиќ по левата страна кој, пак, му сервираше на Лаутаро за негов втор гол и дуплирање на водството.
Потоа во 66. минута точка стави Лукаку и тоа по втора асистенција на Перишиќ.
Милан создаде нешто посериозна шанса дури откако Интер дозволи малку да се разигра условно кажано домаќинот, но и оние удари кон гостинскиот гол словенечкиот голман успешно ги бранеше.
Со овие 3 бода сега Интер има 53 на врвот на табелата во Серија А и 4 повеќе пред Милан кој врза два пораза во низа или три во последните пет натпревари.
