Белгискиот фудбалер Раџа Наинголан наскоро ќе се врати во редовите на Интер.
Искусниот играч за врска дојде во Интер од Рома за 38 милиони евра и Николо Ѕаниоло летото во 2018 година, но за кратко време замина на позајмица во Каљари. Тоа беше поврзано и со здравствената состојба на сопругата на Наинголан која се лечеше од рак, но се чини дека сега се враќаат во Милано.
„На Каљари не му беше во прв план да го донесе Наинголан, но не смеевме да ја пропуштиме приликата да донесеме играч кој ќе го крене моралот на целиот тим. Уверени сме дека тоа беше одличен договор, но тој е играч на Интер и со нив има договор уште две сезони, така што нема веќе потреба да се полемизира неговото останување во Каљари“, рече директорот на Каљари, Марчело Карли.
Италијанските медиуми објавија дека Антонио Конте е подготвен да му даде нова шанса на 32-годишниот Наинголан и ова би можело да биде добра промена за двете страни.
Како многупати досега во фудбалските договори, и ова не е 100% сигурно, а на тоа укажува и објавата во италијански Tuttosport, каде се шпекулира дека можно е Интер да го понуди Наинголан на Фиорентина како дел од договор за Федерико Кјеза плус пари. Кјеза се проценува на 60 милиони евра, а Наинголан на нешто помалку од 20 милиони евра.