Интер го елиминираше Хетафе во единствениот единечен натпревар, Манчестер Јунајтед и Шахтар само ја потврдија предноста од првите натпревари, додека Копенхаген успеа да ја надополни негативата и да избори пласман.
Со четирите натпревари од осминафиналето на Лига Европа конечно продолжија и европските клупски натпреварувања по големата пауза поради пандемијата со коронавирусот.
На неутрален терен во Гелзенкирхен, Германија, Интер и Хетафе одиграа еден решавачки натпревар во кој „Нераѕурите“ излегоа како победници и изборија место во четвртфиналето. Ромелу Лукаку во 33. минута го отвори резултатот, а точка на победата стави штотуку влезениот Кристијан Ериксен во 83. минута.
Манчестер Јунајтед имаше предност од 5:0 од првиот натпревар против ЛАСК, па реваншот на домашен терен беше само формалност. Гостите поведоа преку Филип Визингер во 55. минута, две минути подоцна израмни Џеси Лингард, а Антони Марсијал на две минути пред крајот донесе нова победа за „Црвените ѓаволи“ кои на овој натпревар настапија во комбиниран состав.
Копенхаген успешно ја анулираше предноста на Басакшехир од 0:1 и со убедлива победа од 3:0 замина во наредната фаза. Јонас Винт уште во 4. минута ги израмни силите, а потоа во 53. минута од пенал донеше водство за домаќините, додека сите надежи на Турците ги сруши Расмус Јенсен во 62. минута.
Волфсбург отпатува во Украина со надеж да надокнади негатива од 1:2 во корист на Шахтар, но наместо тоа се врати дома со пораз од 3:0. Најпрво двата тима останаа со играч помалку кога Давит Хочолава во 68. минута кај домаќините и Џон Брукс во 70-тата кај гостите заработија исклучување. Шахтар победата ја одработи фузиозно во последните минути од натпреварот. Во 89. минута Жуниор Мурајс го постигна првиот гол, а во судиското надополнување Манор Соломон и по вторпат Мурајс се погрижија за конечни 3:0.
Според жрепката, веќе е позната една четвртфинална двојка и тоа Манчестер Јунајтед против Копенхаген.
Денеска се играат останатите четири натпревари во кои Интер го чека подобриот од Ренџерс - Баер Леверкузен, а Шахтар победникот од Ајнтрахт - Базел. Олимпијакос - Вулверхемптон и Севиља - Рома ќе ја дадат последната четвртфинална двојка.