Новостите кои пристигнуваат од Италија велат дека и Тухел дал земело светло за Челси да го врати Лукаку во Интер, но само под два услова.
Се чини дека во Челси се помириле дека голгетерот за кого минатото лето платија дебела сума ќе мора да го врата назад од каде што го земале, согалсно желбата на самиот играч.
Но, „Сините“ немаат намера така лесно да се согласат на зделка во која тие би биле во огромна загуба. Имено, италијанските медиуми, и тоа оние најреномираните како Gazzetta dello Sport, Tuttosport и Il Corriere dello Sport, денеска информираа дека Томас Тухел имал состанок со клупската управа за летната трансфер политика. Тој им ставил дознаење дека нема ништо против заминувањето на Ромелу Лукаку, што и не е за изненадување гледајќи го неговиот учинок изминатава сезона каде постигна 15 гола на 44 натпревари во сите натпреварувања.
Проблемот е што Челси на Интер лани му искешира 113 милиони евра за услугите на белгискиот репрезентативец. Интер нема толку пари за да го купи назад, па единствена опција останува позајмицата или некој друг вид на компензација.
Едната опција која Челси ја ставиле на маса е едногодишна позјамица за која „Нераѕурите“ треба да платат 25 милиони евра. Со оглед на финансиската ситуација во тимот од Милано, тешко е за верување дека Интер би се согласил да плати толку пари за играч кој ќе го има на располагање само една сезона.
Втората опција која ја понудил Челси е перманентен трансфер без пари, но со размена на играчи. Нема информација кој играч Челси го побарале, но медиумите од Чизмата претпоставуваат дека се работи за еден од триото Лаутаро Мартинес, Алесандро Бастони и Милан Шкриниар. Тројцата важат за недопирливи во Интер.
Интер сака да го врати Лукаку, со кого го освои Скудетото лани, но ни двата услова не му одговараат. „Нераѕурите“ со овие два услова се буквално како Одисеј кога се нашол меѓу чудовиштата Сцила и Харибда. Од друга страна, пак, Челси сака да се ослободи Белгиецот, но и да не биде во голема загуба со оглед на баснословната сума која ја плати за него. Ова ќе биде долго трансфер лето за двата клуба бидејќи допрва ќе се разгоруваат преговорите за враќањето на Лукаку на „Меаца“.