Раководството на Интер влезе во преговори со претставниците на моментално невработениот Антонио Конте. „Нероазурите“ се потпираат на фактот дека присуството на извршниот директор Џузепе Марота – со кого Конте соработуваше успешно во Јувентус – ќе го убеди експертот да ја прифати функцијата.
Не за прв пат поранешниот менаџер на Челзи е поврзуван со тренерски пост во Интер. Моментално позицијата му припаѓа на Лучано Спалети, но како што се развива сезоната, Италијанецот нема да се задржи на чело за следната сезона.
„Нероазурите“ дозволија огромен неуспех во групите на Лигата на шампионите, кои можеа да ги прескокнат ако победеа дома против веќе испаднатиот тим на ПСВ Ајндховен во последниот натпревар. Во исто време, тимот се наоѓа на 8 поени од вториот во рангот Наполи и цели 19 зад лидерот Јувентус, откако вчера неочекувано изгуби со 0:1 од Торино.
„Калчомеркато“ тврди дека поради сите овие причини, Марота и претседателот Стивен Џан извршиле првичен контакт со опкружувањето на Конте. Последниот ќе стане слободен агент во текот на летото, кога неговиот договор со Челзи истекува, иако беше отпуштен во јули.
Конте и Марота работеа во Јувентус од 2011 до 2014 година. Токму Марота беше човекот кој лобираше кај „бјанконерите“ да се обложат на својот поранешен фудбалер, а тоа се покажа вистинското решение, бидејќи Конте ги освои првите 3 од 7-те последователни шампионски титули на Италија во последните 7 години.
