Интер не успеа да слави на домашен терен против Аталанта со што му отвори пат на Јувентус со триумф вечерва во Рим да избие сам на лидерската позиција во Калчото.
Интер поведе уште во 4-тата минута со голот на Лаутаро Мартинес на асистенција на Ромелу Лукаку и најави победа на дерби пресметката со соседот од Бергамо.
Но, „Нераѕурите“ не успеаја да постигнат втор гол, а после паузата гостите се разбудија и презедоа иницијатива. „Деа“ израмни во 75-тата минута преку Робин Гозенс, а потоа можеше да дојде и до целосен пресврт.
Во 88-мата минута младиот Алесандро Бастони несмасно го бутна Руслан Малиновскиј за удар од белата точка, но Самир Хандановиќ го прочита шутот на Луис Муриел.
Најзадоволни од ремито во Милано се фудбалерите на Јувентус кои вечерва ѝ гостуваат на Рома. Тешко гостување за „Бјанконерите“ на кое со евентуална победа ќе избијат сами на првото место кое досега го делеа со Интер веќе неколку кола.
И Лацио се радува на овој резултат и воедно чека кикс вечер на Јуве во Рим. „Бјанкочелестите“ синоќа среќно славеа над Наполи со минимални 1:0 благодарение на сречниот погодок на Чиро Имобиле на 8 минути до крајот. Лацио сега има 42 бода, 4 помалку од Интер и 3 од Јувентус. Тимот од Рим е во серија од 10 победи во низа со што се приклучи во борбата за Скудетото.