Иако губеа и се мачеа, на крајот „Нераѕурите“ успеаја да прокнижат три бода и тоа со два гола во рок од три минути за победа со пресврт на гостувањето на „Енио Тардини“.
Парма уште еднаш покажа дека е тврд орев за тимот на Антонио Конте. Откако есента одигра 2:2 на „Меаца“ и притоа беше во водство, доцна синоќа на реваншот на свој терен повторно беше блиску до изненадување.
Домаќините поведоа по 15 минути игра откако Жервињо со слалом ја измести гостинската одбрана и го отвори резултатот.
Интер ја контролираше играта, имаше и посед, но никако не успеваше да ја пробие одбраната на популарните „Крочати“ и да создаде сериозна шанса. Напротив, Парма преку контри се закануваше да го дуплира водството.
Упорноста на играњето со нафрлени топки на Интер му вроди плод дури во последните минути од натпреварот. По еден корнер во 84. минута, Лаутаро Мартинес ја чепна топката, таа дојде до дефанзивецот Стефан де Врај кој со глава израмни на 1:1.
Само три минути подоцна дојде пресвртот. Виктор Мозис од свртување нафрли и перфектно го пронајде нововлезениот дефанзивец Алесандро Бастони со кој глава погоди за 1:2. Младиот Бастони лани настапуваше токму за Парма, како позајмен играч.
Со овој натпревар се комплетираше 28. коло по кое Јувентус води со 69 бодови, пред Лацио со 65, Интер со 61 и Аталанта со 57.
