Вистинска драма синоќа имаше во Милано каде Фиорентина до 87. минута имаше водство од 2:3, а по последниот свиреж се упати кон Фиренца со пораз од 4:3.
Мачен старт на новата сезона за тимот на Антонио Конте. Интер синоќа ја отвори сезоната пречекувајќи ја Фиорентина бидејќи во 1. коло доби поштеда како екипа која долго играше во европските купови летово.
Уште во 3. минута Котиворијанецот Кристијан Куаме ги шокираше домаќините откако по една грешка во домашната одбрана непречен од никого постигна гол.
Интер се мачеше да создаде вистинска шанса, а во тоа успеа тек во надополнувањето од првиот дел кога Лаутаро Мартинес со прекрасен удар го израмни резултатот.
Второто полувреме почна лошо за Виола која преку Федерико Чекерини во 52. минута си постигна автогол доведувајќи ги „Нераѕурите“ во водство.
Пет минути подоцна Франк Рибери одлично го проигра Гаетано Кастровили кој израмни на 2:2. Нов шок за Конте стигна во 63. минута кога повторно одлично асистираше ветеранот Рибери, овој пат за Федерико Кјеза кој еден на еден со Самир Хандановиќ погоди за 2:3.
Конте веднаш направи замени ставајќи ги во игра Стефано Сенси и новодојдениот Ашраф Хакими на местото на бледите Кристијан Ериксен и Ешли Јанг. Потоа во игра влегоа и новите засилувања Артуро Видал и Раџа Наинголан, како и Алексис Санчес.
Интер ја презема иницијативата, а израмнувачкиот гол дојде во 87. минута кога Санчес одлично го пронајде Хакими, а Мароканецот со прецизен пас му сервираше на Ромелу Лукаку кој се наоѓаше во позиција од каде не се промашува.
Спасителот на Интер беше Данило Д'Амброзио кој доби висока топка од Санчес, го натскока Душан Влаховиќ и со глава ја смести топката во мрежата на Бартуомеј Дронговски за победа од 4:3.
