Фудбал

Интер со најмногу продадени сезонски билети во Италија

23. август 2019 - 11:00 | Ф.З.

Иако со години се мачи, Интер има најголема поддршка кога игра дома. За претстојнава сезона досега продаде скоро 13 илјади сезонски билети повеќе од шампионот Јувентус.

Чудна е состојбата на трибините во Италија изминативе сезони. Јувентус доминира, гази сѐ пред себе, ама публиката оди да го гледа Интер, која пак игра лошо, киксира против слаби екипи и не освојува титули.

За претстојнава сезона која почнува викендов „нераѕурите“ веќе продале 40 илјади сезонски билети, што е половина од вкупниот капацитет на „Џузепе Меаца“. Јувентус, кој важи за најпопуларен клуб во Италија, продал само 27.700. Ништо чудно, ако се знае дека токму во својот град Јуве ја нема поддршката бидејќи поголемиот дел од жителите всушнoст навиваат за Торино. Но, на натпреварите на Јуве редовно доаѓаат навивачи од цела Италија.

Со оглед на резултатите, добро стои и Милан со 30 илјади продадени влезници. „Росонерите“ се всушност втори после Интер. Трет е Јуве, е четврта Фиорентина.

За пофалба е малиот Лече чии навивачи очигледно се желни за врвен фудбал откако клубот 7 години отсуствуваше од Серија А.

Разочарување е дефинитивно Наполи кој продал само 9 илјади сезонски билети.

Коментирај