Фудбал

Интер тргнува по „отпишаните“: Четворица играчи на Реал Мадрид помеѓу желбите на Конте

12. јуни 2019 - 12:36 | К.З.

Новиот тренер на Интер пристигна во Милано со јасна идеја за реновирање на тимот, а италијанските медиуми сметаат дека веќе ја знаат неговата листа со летни желби и потенцијални засилувања.

Антонио Конте ќе се вклучи во трката за трансфер на дури четворица играчи на Реал Мадрид, кои веројатно следната сезона нема да бидат во прв план кај „кралскиот клуб“.

Откако Интер обезбеди настап во Лигата на шампионите следната сезона, клубот веројатно ќе биде во можност да привлече играчи со сериозен квалитет, а помеѓу најпосакуваните мети се четворица играчи од Реал Мадрид. Се работи за Герет Бејл, Лукас Васкез, Начо и Матео Ковачиќ.

Иако во изминатата година често се шпекулираше дека Лука Модриќ би можел да го засили составот на Интер, сепак тој не се наоѓа помеѓу четворката која ја посакува Конте. Наместо Модриќ, таму е друг Хрват – Матео Ковачиќ, кој пред да потпише за Реал Мадрид настапуваше за Интер. Минатата сезона тој беше на позајмица во Челзи, со кој ја освои Лига Европа.

Сите четворица играчи се наоѓаат на листата на „отпишани“ од страна на Зинедин Зидан, кој им напомена дека можат да почнат да си бараат нов клуб бидејќи не се во неговите планови за следната сезона.

Коментирај