Родителите го сакаат најдоброто за своите деца и би направиле сѐ за да им помогнат да успеат во животот. Тука се да ни подадат рака во животот или да нѐ поттурнат во вистинскиот правец.
Фил Хетфилд си го сфатил ова второво многу буквално. На фудбалскиот натпревар на неговиот шестгодишен син тој буквално го поттурна во вистинскиот правец кога топката се движеше кон неговиот гол.
Тој воопшто не претпоставувал дека ваквиот потег ќе заврши на интернет и ќе стане вирална сензација.
„Акцијата беше на другата страна од теренот, па му се доближав на син ми за да го анимирам и да му дофрлам инструкции. Тој изгледа не ме дослушна, па тргна накај мене, додека топката одеше накај него. Јас само сакав да го вратам каде што стоеше, ама тој падна“, објаснува Фил за BBC.
Дури ни овој потег на „таткото на годината“ не помогна синот да не прими гол.
Токму затоа виралното видео го искоментира и поранешниот голман на Велс и на Евертон, Невил Саутхол, кој на Twitter упати совет до малиот голман: „Секогаш фаќај ја топката од првиот шут на гол“.