Оние кои израснаа во 90-тите секако се сеќаваат на ТВ-серијата „Fresh Prince Of Bel-Air“ со која се прослави Вил Смит.
Но, дали некогаш сте помислиле како ќе се одвиваше приказната за Вил ако не беше лесно сварлива комедија, туку мрачна и сурова драма?
Токму на тоа мислел Морган Купер кога го снимал „трејлерот“ за „Bel-Air“ во кој нуди еден мрачен приказ на оригиналната приказна.
Дејството во фиктивната серија се случува во денешно време и ги опфаќа темите на насилство меѓу банди, полициска бруталност, класна нееднаквост и расна поделба.
„Како повеќето деца од 90-тите, израснав гледајќи го Fresh Prince“, напиша Купер на Twitter кога го објави трејлерот што го снимал шест месеци.
„Дури и кога бев дете, секогаш сметав дека има многу повеќе во таа приказна... па решив да го направам ова.“
Тој е сценарист, режисер и снимател на трејлерот.
Неговата идеја беше прифатена со голем ентузијазам на Twitter, чии корисници веднаш го „тагнаа“ Netflix и покажаа дека имаат огромна желба да го видат ова сценарио во ТВ-серија или филм.
Купер скромно реагираше на одличниот прием.
„Интернетот си е тоа што е. Никогаш не можеш да знаеш дали нешто ќе се ‘фати’ или не. Многу сум возбуден за сѐ што се случи и понизно го прифаќам. Јас сум црн креативец и ја претставувам мојата култура и за мене е многу важно да се изразувам автентично“, изјави тој за Okayplayer.
Дали вие би ја гледале оваа верзија на приказната?
