Иран ја тестираше новата балистичка ракета Хорамшахр со дострел од 2.000 километри и со способност да носи неколку конвенционални боеви глави, со што може да погоди неколку цели истовремено, јавија западните агенции, повикувајќи се на Иранската државна телевизија.
Новата ракета беше прикажана вчера, за време на воена парада во иранската престолнина Техеран. Кога точно се случила пробата не е соопштено, а државната телевизија покажа само кадри од тестирањето.
Веста за ракетното тестирање доаѓа во тензичен момент меѓу Иран и САД во врска со иранската нуклеарна договор, која е остро критикувана од американскиот претседател Доналд Трамп.
Иран веќе поседува две ракети – Гадр-Ф и Сеџил кои имаат дострел од 2.000 километри и се способни да го погодат Израел, но исто така, можат да стигнат и до американските бази во регионот.
Иранскиот претседател Рохани најави дека без оглед на критиката од САД, иранската ракетна програма ќе биде продолжена.
„Ние се залагаме за мир во регионот и во светот, но за одбраната на нашата безбедност, не ни требаат дозволи“, изјави Рохани на воената парада во Техеран.
Американскиот претседател Доналд Трамп во својот говор пред Генералното собрание на ОН, го критикуваше Иран како дестабилизирачка сила во регионот и се закани со откажување на Нуклеарниот договор со Техеран. Трамп го нарече Иран „економски исцедена отпадничка држава“, која извезува нестабилност. На овој режим на убијци не треба да му се дозволи да продолжи со своите активности, истакна Трамп, алудирајќи на војните во Сирија и во Ирак, во кои покрај Иран, се инволвирани и САД. Иранскиот водач, ајатолахот Али Хамнеи говорот на Трамп го отфрли како „евтин, грд, глупав и базиран врз лаги“.
