Светската фудбалска федерација (ФИФА) ја одобри промената на спортско државјанство на младиот Деклан Рајс и отсега па натаму тој ќе биде регистриран како фудбалер од Англија, иако претходно имаше настапувано за репрезентацијата на Ирска.
Фудбалерот на Вест Хем е роден во Лондон, но досега настапуваше за репрезентацијата на Ирска, земјата од која доаѓаат неговите баба и дедо.
Во случај кој беше во фокусот на вниманието веќе подолго време, Деклан Рајс успеа да го промени спортското државјанство иако имаше настап за сениорската репрезентација на Ирска. Според правилата на ФИФА, еден играч не може да настапи за некоја репрезентација доколку претходно имал настап за некоја друга сениорска репрезентација, но олеснителната околност за Рајс беше тоа што неговите три настапи беа од пријателски натпревари.
Сега 20-годишниот Англичанец ќе добие шанса да биде повикан од Герет Саутгејт за следните натпревари на англиската репрезентација, која има завидно силен состав полн со играчи до 23 години.
Англиските медиуми уште сега шпекулираат дека името на Деклан Рајс може да се најде помеѓу репрезентативците одбрани за квалификациските натпревари на Англија против Чешка и Црна Гора, кои се на програмата овој месец.