Веројатно често ви се случува да носите кафе во термос на работа и да не го испиете целото. Сепак, телото може да поднесе само одредена количина кофеин дневно. Но, не го фрлајте кафето бидејќи постојат начин тоа да се искористи за друга намена.
Не мора да значи дека кафето откако ќе се олади е неупотребливо, само треба да внесете малку креативност за да му најдете алтернативна употреба.
Можете, на пример, да направите сируп за коктели од преостанатото кафе. Ако пиете турско кафе, тогаш најпрво ќе треба да го процедите низ цедалка за да не остане крупен дел од талогот. Потоа, откако ќе го ставите кафето во ѓезве за да го згреете, додајте му две супени лажици обичен, бел шеќер и мешајте додека тој не се растопи целосно. Откако ќе го направите тоа, ставете го сирупот во фрижидер и употребете го нареден пат кога ќе сакате да направите некој домашен коктел.
Уште една алтернативна намена за преостанатото кафе е да направите ледени коцки од него. Процесот е многу едноставен, кафето кое нема да го испиете сипете го во калап за ледени коцки и оставете го калапот во замрзнувач. Нареден пат кога ќе сакате да пиете ледено кафе или нес-кафе, разладете го со ваква ледена коцка со вкус на кафе.
За крај, можете да пробате да направите ледено лижавче од кафе. Измешајте го преостанатото кафе со млеко со поголема масленост (3,2%) и сипете ја смесата во калап за сладолед (или пак повторно во калап за ледени коцки). Замрзнете го калапот и за неколку часа ќе имате ледено лижавче со вкус на кафе.