Дали е на повидок создавањето на источен производствен блок во автомобилската индустрија?
Претставници на автомобилската индустрија од Иран, Русија и Турција размислуваат за заедничка програма за дизајнирање и производство на автомобили.
„Постои одлична можност за трипартитна соработка меѓу производителите на автомобили од трите земји. Тие можат да заземат голем дел од пазарот“, рече шефот на Иранската асоцијација на производители на автоделови, Мохамадреза Наџафи-Манеш, објави Радио Слободна Европа, кое пренесува изјави од иранските државни медиуми.
Според него, предлогот прв го претставила Турција, а Русија објавила дека е „заинтересирана“ за соработка.
Многу западни производители на автомобили почнаа да произведуваат автомобили во Русија во последните две децении, но од почетокот на руската инвазија на Украина, повеќето се повлекоа.
Западните земји воведоа санкции кон Русија, кои ја попречуваат автомобилската индустрија во земјата. Потсетуваме дека во 2018 година САД се повлекоа од договорот за иранската нуклеарна програма и повторно воведоа остри санкции кон Иран.
