Мундијалот во Катар по многу нешта ќе биде посебен, а сега ФИФА донесе нова револуционерна одлука откако назначи три главни судијки да ја делат правдата на натпреварите.
За прв пат во мундијалската истприја женски судии ќе судат натпревари од машкиот Мундијал. Тоа ќе се случи наесен кога во Катар ќе се соберат 32-те најдобри светски репрезентации.
ФИФА ги одреди судијките Јамашита Јошими од Јапонија, Стефани Фрапар од Франција и Салима Мукансанга од Руанда, кои ќе ја имаат честа да се запишат во историјата.
Ним ќе им помагаат и три помошни судијки и тоа Неуза Бак од Бразил, Карен Диас Медина од Мексико и Кетрин Несбит од САД.
Судијките се дел од листата на 36 судии кои ФИФА ги објави за завршницата, а таму се и 69 помошници и 24 судии задолжени за ВАР собата.
„Како и секогаш, критериумот што го применуваме е 'квалитетот е на прво место'. Избраните арбитри го претставуваат највисокото ниво на судење во светот. Со ова се комплетира долгиот процес кој започна пред неколку години со воведувањето на судијки на машките турнири за јуниори и сениори на ФИФА. На овој начин јасно ставаме до знаење дека нè интересира квалитетот, а не полот. Се надевам дека делегирањето на судијки за натпреварите од машкото првенство ќе биде нешто нормално, а не сензационално“, изјави претседателот на судиската комисија на ФИФА, поранешниот легендарен судија Пјерлуиџи Колина.
Светското првенство во Катар почнува на 21 ноември.