ММА светот уште со неверување ја прегледува и коментира борбата со која УФЦ одбележа 25 години постоење во Денвер.
Нокаутот „на слепо“, со лакт, во последната секунда од 25-минутната борба, со кој Мексиканецот Јаир Родригез го финишираше „Корејското зомби“ Чан Сунг многумина го прогласија за најдобриот крај во историјата на УФЦ.
26-годишниот Мексиканец се врати во игра по година и пол и ја губеше борбата со 4:1 во рунди. Но, на една секунда пред крајот, убаво го намести лактот.
„Најлуд крај досега. Зомби ја имаше борбата во свои раце, требаше да издржи само уште една секунда. Каков финиш!“, коментираше првиот човек на УФЦ Дејна Вајт.
Потегот на Мексиканецот е нешто што ретко се гледа во УФЦ. Истовремено одбегнување на удар и позиционирање на удар со лакт од позиција „на слепо“ е креативно и ризично решение, што се покажа како успешно за Родригез.
По тешката борба во Денвер и двајцата борци завршија во болница, каде се фотографираа насмеани, докажувајќи дека спортот пред сѐ треба да ги зближува луѓето.