Најголемото судење поврзано со мафијата во Италија во последните три децении започнува денес, а 900 сведоци ќе сведочат против повеќе од 350 лица, вклучително и политичари и официјални лица обвинети дека биле членови на моќната Ндрангета.
Поради ограничувања поврзани со коронавирусот, многу обвинети ќе присуствуваат на првите рочишта преку видеоврска од затвор. Оние во судницата ќе носат маски и ќе ги почитуваат мерките за задолжително физичко растојание, седејќи оддалечени на најмалку два метра.
Скоро сите обвинети беа уапсени во декември 2019 година по долгата истрага што започна во 2016 година и опфати најмалку 11 италијански региони. Околу 2.500 полицајци учествуваа во акциите насочени кон осомничените во Вибо Валентија во Калабрија, срцето на областа што главно беше контролирана од кланот Манкузо од Ндрангета.
Поранешен сенатор, началник на полицијата, локални советници и бизнисмени, обвинети за помагање на мафијата, исто така се уапсени во Германија, Швајцарија и Бугарија.
Никола Гратери, обвинителот што ја водеше истрагата, за време на рациите изјави дека тоа е најголемата акција против криминални групи од судењето на Палермо од 1986 до 1992 година, кога сицилијанските обвинители поставија 475 лица на обвинителна клупа.
За претстојното судење, тимот на Гратери собра 24.000 прислушувани разговори и ги пресретна за да ги поддржи обвинувањата.
