Француската влада се согласи да одобри зголемување на платите за вработените во здравството во вкупен износ од 8 милијарди евра, поздравувајќи ја нивната улога во борбата против коронавирусот.
Синдикатите вчера го потпишаа историскиот договор по седум недели жестоки преговори.
Здравствените работници добија статус на херои во Франција за време на пандемијата и граѓаните редовно и ревносно им ја покажуваа својата благодарност за вложениот труд и пожртвуваност.
Но, лекарите и здравствениот персонал побараа повеќе од оддадено признание и почнаа протести на кои побараа зголемување на платите и поголемо финансирање за болниците.
Некои демонстранти беа парично казнети за кршење на правилата за социјално дистанцирање.
Владата и синдикатите постигнаа договор за зголемување на платите на здравствените работници за 183 евра месечно, во просек.
Најголем дел од пакетот покачувања ќе ги покрие платите на медицинските сестри, негувателите и немедицинскиот персонал. Околу 450 милиони евра се резервирани за доктори кои работат само во јавниот сектор.
Франција е една од најтешко погодените земји од коронавирусот во Европа, со над 200.000 заразени и 30.000 смртни случаи.