Њујорк, 13 август 2019 (МИА) – Експерти на ОН соопштија дека истражуваат најмалку 35 случаи на сајбер напади на Северна Кореја врз 17 земји од светот, што за цел имале незаконско собирање пари за нејзината нуклеарна програма, пишува турскиот весник Sabah.
Минатата недела светските агенции информираа дека Северна Кореја незаконски дошла до „две милијарди долари“ од своите сѐ подобро обмислени и реализирани сајбер активности врз финансиски институции и берзи за крипто валута.
Опширниот извештај на ОН открива дека Јужна Кореја била најмногу засегната, бидејќи дури 10 пати била жртва на вакви сајбер напади, следена од Индија со три и Бангладеш и Чиле со по два напада.
По еден сајбер напад претрпеле 13 држави: Костарика, Гамбија, Гватемала, Кувајт, Либерија, Малезија, Малта, Нигерија, Полска, Словенија, Јужна Африка, Тунис и Виетнам, се наведува во извештајот на ОН.
