Четириесет и два отсто од македонските граѓани би заминале од земјава доколку им бидат обезбедени сите потребни документи. Најголема подготвеност да заминат покажале помладите и оние со повисок степен на образование - универзитетско, покажуваат резултатите од истражувањето на Gallup International Association.
Процентот на граѓани кои би сакале да заминат од земјава е повисок од светскиот кој изнесува 36%. Ако, пак, се погледнат земјите во регионот, голема подготвеност за имиграција над светскиот просек покажуваат испитаниците од Босна и Херцеgовина каде 48% се изјасниле дека би заминале во странство, во Грција каде тој процент е 40, а во Косово 39%.
Помал од светскиот просек имаат Хрватска каде 35% од испитаниците се изјасниле дека би имигрирале, Бугарија со 25% и Словенија 21%. Истражувањето не било спроведено Србија и Албанија.
Во светски рамки истражувањето покажало дека еден од три граѓани сакаат да се иселат од својата земја, а особено младите луѓе со економски потешкотии се меѓу потенцијалните мигранти. Најголема подготвеност за заминување од својата земја покажале испитаниците од Супсахарска Африка и Латинска Америка.
Анализата на резултатите од истражувањето покажува дека главниот фактор за мотивација за имиграција е просечниот приход во земјата, односно колку е тој поголем помала е желбата за заминување и обратно.
Наголем процент граѓани кои се изјасните дека сакаат да заминат имаат Сиера Леоне со 84%, Гана 81% и Нигерија 71%. Најмалку граѓани кои би сакале да ја напуштат својата земја има во Јапонија со 14%, Виетнам 8% и Индија 4%.
Анкетата на јавно мислење, информираат од GIA, е спроведена во 57 земји кои покриваат две третини од светската популација, и околу 90% од земјите кои се слободни да спроведуваат и објавуваат резултати од истражувања на јавно мислење.
Вкупно 54.329 лица биле интервјуирани на глобално ниво. Во РС Македонија, БРИМА, членка на Gallup International Association, го спровела истражувањето со телефонска анкета (CATI), на национален репрезентативен примерок од 800 испитаници на возраст 18+ години, во текот на август 2022, со маргина на грешка од +/- 3,5%, со ниво на доверба од 95%.
