Вакцината против коронавирус на компанијата Johnson & Johnson која се прима само во една доза е безбедна и дава имунолошки одговор и кај младите и кај старите лица, покажуваат податоците од истражувањето кои вчера беа објавени во New England Journal of Medicine.
Научниците од J&J избраа здрави возрасни луѓе на возраст помеѓу 18 и 55 години и лица постари од 65 години и ги повикаа да примат мала доза од нивната вакцина наречена Ad26.COV2.S или плацебо.
До 57 дена сите доброволци имале антитела. Според податоците од истражувањето, најчестите нуспојави биле покачена температура, замор, главоболка, болки во мускулите.
Тестирани се 805 доброволци. Се очекува компанијата да ги објави резултатите од истражувањето од третата фаза во која учествуваа 45 илјади луѓе.
J&J за нивната вакцина против коронавирус ја користат истата технологија која ја користеја за развој на вакцина против ебола.
Ако биде одобрена, оваа вакцина ќе биде третата одобрена вакцина во САД по оние на Pfizer/BioNtech и Moderna. Вакцината на Pfizer е одобрена на 11 декември, а вакцината на Moderna e одобрена на 18 декември.