Со бројни тетоважи од нацистички и фашистички симболи на телото, боксер се бореше во ринг и стана главна тема во Италија.
Бокс натпревар од супер-лесна категорија кој во саботата вечер се одржа во Трст ја потресе Италија поради тетоважите на едниот боксер, оној домашниот. Микеле Броли боксуваше против Мароканецот Хасан Нурдин и иако го загуби натпреварот токму тој е во центарот на вниманието.
Имено, 28-годишниот Броли во рингот влезе со куп тетоважи на неговото тело, но убав поглед на деталите откри шокантни пораки: нацистички и фашистички симболи.
Италијанецот на своето тело меѓу бројните тетоважи има и знаме со ознаката SS на злогласната нацистичка специјална единица Шуцштафел (Schutzstaffel - скратено SS), како и бројот 88 кој кај белите супремасисти го означува нацистичкиот поздрав „Хајл Хитлер“ (Х е осма буква во германската азбука).
Згора на тоа, Броли има и тетоважи од скинхед група, како и симбол на тотенкопс паравоената единица која ги контролирала концентрационите логори во нацистичка Германија.
Борбата беше во живо пренесувана онлајн од страна на La Gazzetta dello Sport, а се вели дека пред почетокот тој од својот агол упатил нацистички поздрав со раката исправена напред.
„Се згрозив кога ги видов нацистичките тетоважи на телото на Броли. Покрај тоа, тој и неговата екипа се поздравуваа со римскиот поздрав (испружената рака прифатена од Хитлер и Мусолини всушност датира од антички Рим и во Италија сѐ уште ја нарекуваат римски поздрав, заб. на прев.). За нив тоа е нормално, за мене не е. Морам да напоменам дека Броли со мене цело време беше учтив, пред и по борбата. На крајот ми ја честита победата“, вели противникот на Броли и победник на борбата, Нурдин.
Во Италија постои закон со кој секаква манифестација на фашизам и нацизам се забранети, а секоја личност која на било каков начин ќе се обиде да ги оживее би можела да се соочи и со казна затвор до две години.
Отворена е истрага како Италијанската боксерска федерација му дозволила на Броли да се натпреварува со такви тетоважи.